पुणे : खरीप हंगामासाठी योग्य नियोजन करून शेतकऱ्यांसाठी असलेल्या विविध योजनांची प्रभावीपणे अंमलबजावणी करण्याच्या सूचना विभागीय आयुक्त डॉ. दीपक म्हैसेकर यांनी दिल्या आहेत.
खरीप हंगाम, पीक कर्ज व पीक कर्जांचे पुनर्गठन याबाबत पुणे विभागाची आढावा बैठक डॉ. म्हैसेकर यांच्या अध्यक्षतेखाली व्हिडिओ कॉन्फरन्सद्वारे विभागीय आयुक्त कार्यालयातील सभागृहात झाली. त्यावेळी ते बोलत होते. या वेळी पुण्याचे जिल्हाधिकारी नवल किशोर राम, महसूल विभागाचे उपायुक्त प्रताप जाधव, रोजगार हमी योजना विभागाचे उपायुक्त अजित पवार, विभागीय कृषी सहसंचालक दिलीप झेंडे, जिल्हा अग्रणी बँकेचे आनंद बेडेकर आदी उपस्थित होते.
डॉ. म्हैसेकर म्हणाले, ‘मान्सून लांबणीच्या अनुषंगाने कृषी विभागाच्या अधिकाऱ्यांनी शेतकऱ्यांना योग्य ते मार्गदर्शन करावे. पीक कर्ज वाटपाबाबत विशेष लक्ष द्यावे. कर्ज पुनर्गठनात लक्ष देऊन पीक कर्ज वेळेत उपलब्ध करून द्यावे. पीक विम्याबाबत शेतकऱ्यांना अडचण भासू देऊ नये. तालुका कृषी अधिकाऱ्यांनी गुणवत्ता नियंत्रणाअंतर्गत बियाण्यांची तपासणी करावी.’
शेती पंपांना वीज पुरवठा, टंचाई नियोजन, गोपीनाथ मुंडे शेतकरी अपघात विमा योजना, प्रधानमंत्री पीक विमा योजना, जलयुक्त शिवार अभियान, मागेल त्याला शेततळे व अन्य कृषीविषयक योजनांचा आढावा डॉ. म्हैसेकर यांनी बैठकीत घेतला; तसेच शेतकऱ्यांसाठी असणाऱ्या योजनांची प्रभावीपणे अंमलबजावणी करण्याच्या सूचनाही त्यांनी केल्या.
सध्या बियाणे तसेच खतांचा पुरेसा साठा उपलब्ध असून पिकांवरील अळीच्या प्रतिबंधासाठी उपाययोजना सुरू असल्याची माहिती कृषी विभागाच्या अधिकाऱ्यांनी दिली.
या बैठकीत विभागातील सर्व जिल्हाधिकारी व्हिडिओ कॉन्फरन्सद्वारे सहभागी झाले होते. या वेळी महसूल, कृषी, सहकार विभागासह जिल्हा अग्रणी बँक व अन्य बँकांचे अधिकारी उपस्थित होते.
